ابڙو اڪيڊمي Abro Academy
2020-07-18
داخلا نمبر 506
عنوان رَج ڳجهه
شاخ پکي
پڙهيو ويو 453
داخلا جو حوالو:
رَج ڳجهه
100 کان 110 جسامت جي ھيءَ ڳجھه جبلن ۽ نيم صحرائي علائقن ۾ رھي ٿي. نر مادي هڪ جهڙا ٿين ٿا. رنگ ڪارو يا ڪارسرو ناسي، مٿو ۽ ڳچي اگهاڙي، بي کنڀ، چمڙيءَ جو رنگ گلابي، ڪنڌ تي ڪارن کنڀن جو مُچو، چهنب ڊگهي ڪاري ۽ مڙيل اٿس جنهن سان ڍونڍ جو گوشت ۽ آنڊا گونڊا چيرڻ ڦاڙڻ ۾ ڏاڍي مهارت اٿس. عام طور تي خاموش ھوندي آھي. ڏينھن جو اڪيلي رھي ٿي ۽ آرام جي وقت لاھين يا زمين تي گڏجي ويھندي آھي.
ٿلهو ٿوٻرو جسم هئڻ ڪري ھي ڳجھه اڏامڻ کان اڳ ڊوڙ پائيندي آهي، ساڳيءَ طرح لهڻ کان پوءِ ڪجهه پنڌ ڊوڙندي ويندي آهي. اکيون تيز اٿس ۽ ڍونڍ ڳولڻ ۾ دير نه ڪري. ڳجهون ويرانين ۾ پنهنجيون ڪالونيون ٺاهي رهن ٿيون. ھي پکي مارچ اپريل جي مھيني ۾ افزائش نسل ڪندو آھي. ان جو آکيرو ڪاٺين ، تيلن ۽ جانورن جي کلن تي مشتمل ٿئي ٿو جيڪو ڪنھن اڀي جبل تي صنوبري وڻ تي 8 کان 10 ميٽر مٿي ھوندو آھي. رج ڳجھه ماحول: 3 جو پکي آھي.